Alderdiak baliabide publiko horiek langileen soldata- eta lan-baldintzak hobetzera eta pentsioen sistema publikoa indartzera bideratzea proposatzen du, eredu desberdin eta atzerakoi baten aurrean
Elkarrekin Podemos Bilbao udal-taldeak Bilboko Udalari eskatu dio alderdi sozialarekin eta sindikalarekin izandako elkarrizketan sartzeko udal langileek Elkarkidetza BGAEen bidez pentsio-plan pribatuetara egindako ekarpenak kentzea eta haien balioa toki-administrazioko funtzionarioen nominetan integratzea, dagokien zatian, eta, horrela, plantillaren baldintzak hobetzea eta politika publikoak indartzea.
Eusko Jaurlaritzako Ogasun eta Finantza Sailaren beraren arabera, gizarte-aurreikuspen osagarriko sistema horiek enpresa handiaren, finantza-sistemaren eta sektore publikoaren segmentu oso espezifikoetan biltzen dira, eta, beraz, euskal ekonomiaren produkzio-sare orokorretik urrun. Horrela, batez ere aurrezteko gaitasun handiagoa dutenei mesede egiten dien eta desberdintasunak sortzen dituen eredu bihurtzen da.
Ana Viñals udal taldeko bozeramaileak defendatu duenez, “Administrazio Publikoek ez lukete baliabide publikorik erabili behar desberdintasuna sortzen duten aurrezteko sistema pribatuak sustatzeko. Diru publikoak lan-baldintzak hobetzeko eta kalitatezko zerbitzu publikoak bermatzeko balio behar du”.
Viñalsen esanetan, “pentsio duina izateko eskubidea ezin da pertsona bakoitzak bere lan-bizitzan aurrezteko duen gaitasunaren araberakoa izan”, eta politika publikoek elkartasuna eta pentsioen sistema publikoa indartzea lehenestea eskatu du.
Elkarrekin Podemos Bilbaoren ustez, gaur egun BGAEetara bideratzen diren baliabideak udal langileen soldata eta lan baldintzak hobetzera eta zerbitzu publikoak eta gizarte politikak indartzera bideratu beharko lirateke. “Desberdintasunak murrizten dituzten politikak behar ditugu, ez areagotzen dituztenak”, gaineratu du Viñalsek.
Testuinguru horretan, Podemos Bilbaok aurreikuspen pribatuaren eredua eta horrek berdintasunean eta pentsioen sistema publikoan dituen ondorioak izango ditu ardatz ikasturte politiko berriari hasiera emateko, "Pentsio Publikoak BAI, BGAE EZ" lelopean. Taldeak ekitaldi bat egingo du irailaren 11n, ostiralean, 19:00etan, Bilboko egoitzan (Harategi Zaharra, 2, Alde Zaharra), eta gai horri helduko dio.
PODEMOS Ahal Dugu
