Osoko bilkurak Podemosek OHZri (IBI) aurkeztutako hainbat zuzenketa ere onartu ditu, zerga ahalegina bidezkoago banatzeko
Podemos Donostiak ospatu du osoko bilkurak turismo egonaldien gaineko zerga berria onartu izana. Alderdiak hamar urte daramatza neurri hori eskatzen. "Azkenean, bisitariek ere lagunduko dute hiriari eusten. Aspalditik borrokatu dugun aurrerapauso garrantzitsua da", adierazi du Víctor Lasa bozeramaileak.
Hala ere, Podemosek deitoratu du udal gobernuak turismoaren presio berezia jasaten duten udalerrientzat aurreikusitako % 50eko errekargua ezartzeko proposamena baztertu izana. Alderdiak gogorarazi du zerga mailakatua eta egokigarria izateko diseinatu zela, hain zuzen ere Donostiaren egoerak beste udalerri batzuenak baino erantzun sendoagoa eskatzen duelako.
"Ez dugu ulertzen tresna hori lortu ondoren Gobernuak haren funtsezko aukera bat ez erabiltzea erabaki izana. Gure zuzenketan jasotako aurreikuspenen arabera, 3,5 milioi eurorainoko diru sarrerei uko egiten die. Diru hori donostiarren bizitza hobetzeko erabil liteke, turismo sektoreak hiriaz baliatzen jarraitzen duen bitartean", adierazi du Lasak.
Osoko bilkurak, bestalde, Podemosek OHZri aurkeztutako hainbat zuzenketa onartu ditu. Oro har, jarduera ekonomikoek, azpiegitura handiek eta higiezinen erabilera jakin batzuek ekarpen handiagoa egitea dute helburu, baita gizarte onura batek justifikatzen ez dituen zerga abantailak saihestea ere. "Gure jarrera erraza da: hiritik etekin handiena ateratzen dutenek ekarpen handiagoa egin behar dute hiriari eusteko. Norabide hori defendatu dugu bai OHZn, bai turismo zergan", amaitu du Lasak.
PODEMOS Ahal Dugu
