Podemosek biharko osoko bilkuran defendatuko du zergaren tarifetan % 50eko errekargua ezartzea, araudiak turismoaren presio berezia jasaten duten hirientzat aurreikusten duen bezala
Podemos Donostiak zuzenketa bat aurkeztu du turismo egonaldien gaineko zerga berriari % 50eko errekargua ezartzeko, udal gobernuak errekargua % 0an uztea erabaki duen bitartean. Ordenantzak errekargu hori ezartzeko aukera ematen du, baina Gobernuaren proposamenak ez du aukera hori baliatzen.
Víctor Lasak gogorarazi du Podemosek zerga berriaren negoziazioan defendatutako gaietako bat zerga mailakatua eta egokigarria izatea izan zela, bisitarien ekarpena udalerri bakoitzak jasaten duen presio turistikoari eta ostatu motari egokitu ahal izateko, zerga zama sozialki bidezko moduan banatuz. "Ahalegina egin behar izan genuen Donostia bezalako hiriek turismo intentsitate askoz txikiagoa duten udalerriek baino erantzun anbizio handiagoa eman ahal izateko tresna bat lortzeko. Ez luke zentzurik tresna hori eskura
izateak eta orain hura erabiltzeari borondatez uko egiteak".
Podemosek bereziki gaitzetsi du udal gobernua bere aurreikuspenen arabera 3,5 milioi eurorainoko diru sarrerei uko egiteko prest egotea. Bere ustez, erabaki horrek ostatu turistikoen sektoreari egiten dio mesede ekonomikoki, eta herritarrei dagozkien onura publikoak kentzen dizkie, gaizki kudeatutako turismo hazkundearen ondorio negatiboak urte luzez jasan ondoren.
"Urte askoan turismoaren eta hotelen industriak oparotasun handia izan du, jarduera horri lotutako kostuen eta eragin negatiboen zati handi bat hiriak bere gain hartu duen bitartean. Edozein industria intentsibo edo erauzlek bezala, aberastasuna sortzen du, baina baita kanpo eraginak ere: presioa etxebizitzan eta espazio publikoan, saturazioa eta ingurumen kostuak. Ez dugu ulertzen Udalak donostiarren bizitza hobetzeko erabil litezkeen 3,5 milioi eurori uko egitea, turismo sektoreari dagokion ekarpena murrizteko", adierazi du Lasak.
"Turismoak modu bidezkoan lagundu behar du bere balioa ematen dion hiriari eusten. Zerga mailakatua eta egokigarria izatea lortu bagenuen, hain zuzen ere, presio turistikoa handiena den tokietan indar handiagoz ezarri ahal izateko izan zen. Eta Donostia toki horietako bat da", amaitu du.
PODEMOS Ahal Dugu
